GARRI SCARCITY HITS NIGERIA

We no know wetin no go dey scarce for Nigeria again, the last time na the idea of importation of beans from Burkina Faso our dear President bring, but this time around na Garri we dey import from Republic of Benin because dem say the commodity scarce for Nigeria.

Na wa o, how garri go come scarce so tay we dey go import am from another country? Na true say Uncle Sege don tackle the fuel scarcity problem but e be like say this garri palaver go get K-leg o.

And make una dey see o, this our Presido na correct farmer he be before and even now, we even hear say he don ban imported food items in Aso Rock. Instead na fresh food items from Baba's Otta farm dem dey eat for the Villa now.

Farmer Segun, wetin happen to "Operation Feed the Nation", at least na you tell Nigerians during your first reign as a military head of state to go back to farm, which you too come lead by example. Abi na "Operation Starve the Nation" you dey for now?

Abeg make una do something o, make e no be say na vegetables we go dey import soon.

At least if people dey fight you for your political policies, we think say it will be wise to re-introduce Operation Feed the Nation. Abi e don become case of person wey don chop and belleful no dey get time to fight. And remember say "an hungry man is an angry man", 2003 dey come o.